आम्ही कोण ?- प्र. के. अत्रे

आम्ही कोण?' म्हणून काय पुसता दाताड वेंगाडुनी ?
'फोटो' मासिक पुस्तकात न तुम्ही का अमुचा पाहिला ?
किंवा 'गुच्छ' 'तरंग' 'अंजली' कसा अद्यापि न वाचला ?
चाले ज्यावरती अखंड स्तुतिचा वर्षाव पत्रांतुनी ?

ते आम्ही - परवाङ्मयातील करू चोरुन भाषांतरे,
ते आम्ही - न कुणास देऊ अगदी याचा सुगावा परी!
डोळ्यांदेखत घालुनी दरवडा आम्ही कुबेराघरी!
त्याचे वाग्धन वापरून लपवू ही आमुची लक्तरे!

काव्याची भरगच्च घेउनि सदा काखोटिला पोतडी,
दावू गाउनी आमुच्याच कविता आम्हीच रस्त्यामधे,
दोस्तांचे घट बैसवून करु या आम्ही तयांचा 'उदे'
दुष्मानावर एकजात तुटुनी की लोंबवू चामडी!

आम्हाला वगळा-गतप्रभ झणी होतील साप्ताहिके!
आम्हाला वगळा-खलास सगळी होतील ना मासिके!


कवी - प्र. के. अत्रे ( केशवकुमार )