मग माझा जीव तुझ्या

दुःखाच्या वाटेवर गाव तुझे लागले
थबकले न पाय तरी,हृदय मात्र थांबले
वेशीपाशी ऊदास हाक तुझी भेटली
अन माझी पायपीट डोळ्यातून साडंली
मग माझा जीव तुझ्या वाटेवर वणवणेल
अन माझी हाक तुझ्या अंतरात हुरहुरेल
मी फिरेन दुर दुर तुझिया स्वप्नात चूर
तिकडे पाउल तुझे उंबर्‍यात अड्खळेल
विसरशील सर्व सर्व आपुले रोमांच पर्व
पण माझे नाव तुझ्या ओठांवर हुळहुळेल
सहज कधी तू घरात लावशील सांजवात
माझेही मन तिथेच ज्योती सह थरथरेल
जेव्हा तू नाहशील दर्पाणात पाहशील
माझे अस्तित्व तुझ्या आसपास दरवळेल
जेव्हा रात्री कुशीत माझे घेशील गीत
माझे तारुण्य तुझ्या गात्रातून गुणगुणेल
मग सुटेल मंद मंद वासंतिक पवन धुंद
माझे आयुष्य तुझ्या अंगणात टपटपेल
                           सुरेश भट